زمرہ:ردیف ک

ردیف ک

دیوان ِمنصور آفاق

mansoor afaq poetry

غزل

ہونٹوں بھری رکھ دی درِ انکارِ پہ دستک
دی ہم نے زبردستی لبِ یار پہ دستک

اک شام پلٹ آئے ہیں یہ بات الگ ہے
دی پائوں نے برسوں رِہِ پُرخار پہ دستک

پھر رات کی رانی کا محل سامنے مہکے
پھر صبح کی چڑیوں بھری چہکار پہ دستک

کاندھے پہ کوئی بھیدوں بھری پوٹلی رکھ کر
دیتا ہے پھر امکان ابد زار پہ دستک

دم بھر کو نئی صبح کا اعلانیہ سن کر
دی اہلِ قفس نے گل و گلزار پہ دستک

بازار سے گزرا تو چہکتی ہوئی رت کی
تصویر نے دی جیبِ خریدار پہ دستک

کچھ ہاتھ کہیں اور سے آیا ہی نہیں ہے
دینا پڑی پھر عرشِ کرم بار پہ دستک

ممکن ہے ملاقات ہو آسیبِ بدن سے
اچھی طرح دے کمرہ ء اسرار پہ دستک

ہے فرض یہی تجھ پہ یہی تیری عبادت
اے خاک نسب ! خانہ ء سیار پہ دستک

درویش فقیری ہی کہیں بھول نہ جائے
ہے کون یہ دیتا ہے جو پندار پہ دستک

وہ دیکھئے دینے لگا پھر اپنے بدن سے
اک تازہ گنہ ، چشم گنہگار پہ دستک

اٹھ دیکھ کوئی درد نیا آیا ہوا ہے
وہ پھر ہوئی دروازہ ء آزار پہ دستک

دشنام گلابوں کی طرح ہونٹوں پہ مہکیں
درشن کے لئے دے درِ دلدار پہ دستک

برسوں سے کھڑا شخص زمیں بوس ہوا ہے
یہ کیسی سمندر کی تھی کہسار پہ دستک

پانی مجھے مٹی کی خبر دینے لگے ہیں
اک سبز جزیرے کی ہے پتوار پہ دستک

افسوس ضروری ہے مرا بولنا دو لفظ
پھر وقت نے دی حجرہ ء اظہار پہ دستک

مایوسی کے عالم میں محبت کا مسافر
در چھوڑ کے دینے لگا دیوار پہ دستک

دی جائے سلگتی ہوئی پُرشوق نظر سے
کچھ دیر تو اس کے لب و رخسار پہ دستک

اب اور گنی جاتی نہیں مجھ سے یہ قبریں
اب دینی ضروری ہے کسی غار پہ دستک

منصور بلایا ہے مجھے خواب میں اس نے
دی نیند نے پھر دیدہ ء بیدار پہ دستک



دیوان منصور آفاق