زمرہ:ردیف ث

دوسری غزل

ساحلِ یاد پہ آہوں کا دھواں کارِ عبث
بہتے پانی کی قسم ، گریہ ئ جاں کارِ عبث

دھوپ میں ساتھ بھلا کیسے وہ دے سکتا تھا
ایک سائے کے لئے آہ و فغاں کارِ عبث

میں تماشا ہوں تماشائی نہیں ہو سکتا
یہ فلک فہمی یہ تسخیرجہاں کارِ عبث

تیرے ہونے سے مہ و مہر مرے ہوتے تھے
اب تو ہے سلسلہ ئ کون و مکاں کارِ عبث

یہ الگ چیختے رنگوں کا ہوں شاعر میں بھی
ہے مگر غلغلہ ئ نام و نشاں کارِ عبث

ایک جھونکے کے تصرف پہ ہے قصہ موقوف
بلبلے اور سرِ آب رواں کار عبث

خیر باقی رہے یا شر کی عمل داری ہو
دونوں موجود ہوں تو امن و اماں کارِ عبث

کوئی انگلی ، کوئی مضراب نہیں کچھ بھی نہیں
کھینچ رکھی گئی تارِرگ جاں کارِ عبث

رہ گئے جنت و دوزخ کہیں پیچھے منصور
اب جہاں میں ہوں وہاں سود و زیاں کارِعبث




دیوان منصور آفاق